تبي النعم يابعده على شاربك بعداه

مادامك تحب الروح والمال تقصر به

فلا يستحق النعم من ترتعد يمناه

من المد والاّ فاللقاء زرقة الحربه

ولابه بخيلِ عند ربعه يجي له جاه

ولابه ذليلٍ فاللقاء ينتستر به

ولابه رديٍ حصّل المجد في دنياه

ولا يمكن ان حتى بناته تفاخر به

خذ العلم مني واسمعه وافهمه واقراه

ان كانك تحب النعم ومضيّعٍ دربه

ترى النعم مثل العيلم اللي بعيدٍ ماه

وكلٍ حسب مجهوده وحبله وغربه

أحدٍ مسقيٍ ربعه وأحد مسقي لمن جاه

وأحد سقوه لنفسه وأحد مالقى شربه

وسود النوايا عيب وصدوقها منجاه

ومنهو يغدر الناس لابد يغدر به

وانا رجل لي مبدأ وكلٍ على مبداه

كلامٍ عليه ثبوت والناس تشعر به

أنا ماامدح الاّ من صنع مجده بيمناه

إلى غاب يفقد وان حضر ينتباشر به

صميدع مراجل طيب فعله يغيض عداه

يفخر به الطيّب ويتعب يبي قربه

فيازينها لاصار قولي على معناه

وقمت أمدح اللي طيب فعله يشهّر به

كريمٍ حشيمٍ متعبٍ حاله ومخباه

لخدمة بني عمه ومن يشكي الكربه

عرفته بذكره قبل معرفتي امحيّاه

هذا والله اللي مدحه ايزيدني طربه

** **

- مشعل بن سابر القحطاني