ما للغلا ياغايتي باب نسيان

في كل لحظه نار طاريك حيّه

بين الخفوق وبين تعبير الأشجان

مكانتك مثل الوقار امحميّه

أخذت الأول وانت الاول ولاكان

قبلك ولا بعدك خذا الاولويّه

في خاطري والفعل للقول برهان

خذها صراحة قلب عن حسن نيّه

اشتقت لك والشوق في بعض الأحيان

له سلطةٍ ماحكمها في يديّه

قانونها عكس القوانين مالان

على القلوب بكل حالٍ قويّه

لهفة خفوقٍ شوقها موعده حان

ولا عاد تطري غير فرحة مجيّه

تجاوزت كل الحواجز على شان

هيبة غلاك اللي لها مقدريّه

في كل نبضٍ للغلا والغلا بان

حتى بهمسات الجروح الخفيّه

تشوف فيك أسمى التعابير عنوان

مثل الجزاله بالكفوف النديّه

وتعلّمت منك الوفا والوفا صان

نفسٍ مشاعرها صريحه نقيّه

ماهيب تقبل هاجسٍ للغلا خان

ولا هيب جسرٍ للجفا والخطيّه

امّا تقابل صاحب الخير بإحسان

والاّ تسامح والليالي مديّه

** **

- فتاة نجد