للشاعر الأمير الدكتور سعد آل سعود (أبوفيصل) أسلوبه المتفرّد الذي يخاطب فيه رفاع الذائقة من القلب للقلب بألق حضور (منادي) المعتاد في قصائده المُبهرة دائما:

أحبابك أحبابك.. اللّي مالهم غيرك

لاعاد تستغرب إن غابوا بلا رجعه

ياصاحبي.. ريّح إحساسك وتفكيرك

الحب يمسح مثل ماتمسح الدمعه

وش عاد.. لو خان صوت الحب تعبيرك

أحباب لو تنطفي بقلوبهم شمعه

وش عاد.. غير الجفا ورياح تغييرك

وش عاد.. غير الحزن والجرح والفجعه

ياغربة الحب بان اليوم تأثيرك

ياشينه اسبوعنا.. وأيامه السبعه

لاتطري البعد.. قالتها تعابيرك

لاتطري الوصل والآمال منقطعه

يا صاحبي.. قبل شرهاتي وتبريرك

كانه خذلك الغلا.. مافالغلا طمعه

عاشقك لو صارت اشواقه معاذيرك

يمر صوتك على خاطره ماسمعه

لامات قدر الغلا.. لاعاش تقديرك

ياشين نكران من كان الوفا طبعه

يا صبح الأحباب لو طارت عصافيرك

تغريدها حزن والأشواق مصطنعه

سراب الأيام.. ما تصدق مشاويرك

من خانه السبت.. كيف بيامن الجمعه

هو الزمن يا هوى.. فرّق جماهيرك

والا الهوى يازمان أحزان مجتمعه

ياصاحبي.. والقدر شرّه غلب خيرك

أحبابك أحبابك.. وغابوا بلا رجعه

** **

- الأمير د. سعد آل سعود (منادي)