الموضوعات الأكثر
مهدي العبار العنزي
بمناسبة نجاح مؤتمر القمة العربي الذي ترأسه صاحب السمو الملكي الأمير محمد بن سلمان ولي العهد رئيس مجلس الوزراء - حفظه الله.
باسم ربٍ لادعى عبده يجيبه
خالق الإنسان وارزاقه كتبها
له نصلي له نصوم ونلتجيبه
فارج الشدات ومخلص كربها
يا كريمٍ ما درى غيره بغيبه
دعوتي يا الله يا رحمن اجبها
احفظ اللي كل شعبه يعتزيبه
خادم البيتين يفخر في لقبها
من نصى مكة ومن هو زارطيبه
توسعاته شامخه محدٍ حجبها
المليك اليادعانا ننتخيبه
نخوةٍ رمز الوفا عنده وجبها
خذ وفانا جاك ما جالك غصيبه
وخذ عهودٍ من كتبها ما شطبها
سيدي ما هي على شعبك غريبه
ساكنٍ بقلوبنا حبك كسبها
صاحب الاريا السديدات الصليبه
والفضايل مالكٍ بالعز أدبها
يوم نادت له فلسطين السليبه
ما نساها ما ترجى من سلبها
ويوم صاح القدس من هول المصيبه
فزعته دوى مع العالم غضبها
واليمن ما قال حنا وش نبيبه
يوم العابث عاث فيها واغتصبها
ما رضى مبدا التهاون والغليبه
ومن يخون الدين بأمر الله نكبها
جهز رجالٍ عدو الله تصيبه
الصقور اللي على الجبهه ندبها
وجهو اللحقد ضرباتٍ عطيبه
واندحر مذموم وأحلامه سحبها
ملك حزم وملك عزم وملك هيبه
ورجل سلم وحرب لا شبت حطبها
وفي يمناه السيف الأجرب ينغزيبه
صاحب الوقفات ومطوع صعبها
ياولي العهد ما بالقول ريبه
يا خلفها في سلفها ياجنبها
في وجودك كل مجدٍ نعتليبه
فوق هام السحب يا محقق طلبها
ياحكيم الرأي رايك نقتديبه
يا نظركل العيون وياهدبها
انجازاتك في وطنا نهتنيبه
والمستقبل أشمل وأعظم وأبها
أنت هوماتك بعيدات وتعيبه
والأهداف الساميه عقلك رغبها
صاحب الرؤيا على غيره صعيبه
ابتكرها واعتمدها وانتخبها
والمراجل حطها الله من نصيبه
موهبه والرب لمحمد وهبها
واقتصادٍ تحتميه ونرتهيبه
هو شرايين البلاد وهو عصبها
قلت بالقمة كلامٍ نقتديبه
العرب لا فرق المولى شعبها
سيفهم درع العرب عزوه وهيبه
امةٍ بك تنتخي محدن غلبها
والمسافات البعيده والقريبه
أنت من حط العلامات وحسبها
والمهمات الخطيره والعصيبه
انت من هدى الصعيبات وغلبها
يا سليل المجد دايم تحتفيبه
يا فخر كل الأشاوس يا طربها
كل شعب المملكه رتل وكتيبه
نارهم صبت على الطاغي لهبها
كم عديمٍ بالوغى يدحر حريبه
وكم شجاعٍ للوطن روحه جلبها
سيدي والدار مجدٍ نحتميبه
من غلاها رملها يشبه ذهبها
كلنا فدوه لدولتنا الحبيبه
ما نتهاون في نداك وفي طلبها
عزنا بالله نسود ونستويبه
ثم عز اللي نحارب من حربها
ومن تنكر للوطن ربه حسيبه
امه اللي عزته ينكر تعبها
ومن يخون بلادنا وش نحتريبه
عقرب الطين اللعين اقطع ذنبها
ولانتسمع للتصاريح المريبه
وكل منهو نيته معنا قلبها
كل مجده كل عزه كل طيبه
ضدنا كل الحماقات ارتكبها
ما سألنا عن غثاه وعن نحيبه
كأس غدره يوم جهزها شربها
بالخداع يودي العلم ويجيبه
والمشاكل كلها مصدر سببها
ياسليل المجد والساس العريبه
يعربي الأصل من صفوة عربها
الرياضه كل دعمك تغتنيبه
اند يتها كلها مع منتخبها
بشراهل الهجن ماللهجن غيبه
عن ميادين السباق وعن صخبها
ياحفيد اللي على كور النجيبه
مثل أبو تركي قليل اللي ركبها
كم سراله ليلةٍ ما ينسريبه
مع بطون شعابها. ياما شعبها
جا يرد الدار ماراحت ذهيبه
شامت وعافت سواه اللي خطبها
مهرته صوب العلا عجلٍ هذيبه
اعتلاها. وصوب عدوانه هذبها
مع رجالٍ لازهم كل ٍ يجيبه
سم ياعبدالعزيز القوم نبها
الجزيره قبل أبو تركي غضيبه
ويوم جاها صانها وأبعد رعبها
شرها كانت تبيع وتشتريبه
وبالهدى والعدل والحكمه قضبها
يالله انك ترحمه يالله تثيبه
والملوك اللي على العليا نجبها
جعل مسكنهم بجناتٍ رحيبه
دارجات أنهارها داني رطبها
تمت وصلوا على من نهتديبه
عدة اعداد النجوم ومن رقبها