المترف اللي (ما وصفته) القوافي |
مهما كتبته (شعر) ما أحس عبرت!! |
أظلمه لامن قلت به شيء وافي |
كيف اعتذر لامن وصفته وقصرت؟ |
قلت أكتبه والشعر فيه اختلافي |
واحتارت حروف القصايد وأنا احترت |
هذاك نساني السنين العجافي |
معاه أحس إني (عن أول).. تغيرت |
هذاك (صحى) كل ما كان غافي |
وأنا عن أحلامي وطموحي تشكرت.. |
دافي مشاعر وكل ما فيه دافي |
يداري إحساسي ليا من تكدرت |
شوقي على شانه فضح كل خافي |
وأنا بكل (مميزاته) تأثرت.. |
مافي سبب واضح لكل انجرافي |
إلا أنه أصبح (موطن لي) وأنا صرت |
أسير نظراته و(هذا اعترافي) |
إنه ليامنه لحظني تبعثرت..! |
قولوا له إنه لو جرحني عوافي |
ياكثر ماني من (طعونه) تصبرت.. |
مسكنه ما بين الضلوع النحافي |
عليه ضميت (المحاني).. وسكرت |
لأنه بعيني (شيء) والله خرافي |
ولأني إلى الحين ما أحس عبرت..! |
نواف الصويلي |
|
