الله أكبر والامانه ما لها غير الامين |
والمعرفه عز وشرف والتجربه نور وذرى |
عن كل تيار يذعذع من يسار ومن يمين |
ما يلتفت راع الضمير الحي وعيونه ترى |
النور في عرض السما والعاقبه للمتقين |
العلم يرقي للعلا والجهل يرجع للورى |
الله يوفقنا طريق الطيبين الغانمين |
اللي لهم في ساحة اهل الطيب بيع ومشترى |
متواضعين وفاهمين وعارفين وخابرين |
ان الليالي ما تدوم بحال والساري سرى |
الآدمي مهما بلغ مخلوق من ماء مهين |
والمشكله يدري وكنه بالحقيقه ما درى |
تقفي به الغفله وتطويه الليالي والسنين |
واللي يبي رد البرى عليه مردود البرى |
اجمال بقعا سارحات وضاويات الله يعين |
احيان تنزل مع كرى وحيان تطلع مع كرى |
والمعتبر عقله دليله يعتبر بالراحلين |
دام الصميل اللي على جنب المطيه ما نفرى |
ذكر الحيا والطيبين يبين والقاسي يلين |
ونهاية الموضوع يا هل العاصمه وام القرى |
كم واحد تحت الثرى ذكراه بين الطيبين |
وكم واحد عايش وذكره فانين تحت الثرى |
صالح بن عبدالرحمن الناصر - الزلفي |
|
