قصيدة ترحيبية بمناسبة عودة خادم الحرمين الشريفين إلى المملكة جادت بها قريحة الزميل الشاعر مشعل بن قيقان الجبوري العنزي |
القلب يفرح وان وصل منبع الجود |
الله يلوم اللي لشرواي لا يم |
غلاه راسخ بالوفا عدة عقود |
مع ما استجد وماضيات قدايم |
شفت الطريق اللي سلكناه مسدود |
عام اتحرا فيه وقت ملايم |
عبر الصحافه باقه شعور بورود |
ارسل له الاشعار مع كل حايم |
عبد الله اللي كل شعبه له شهود |
لشعبه الطف من رقيق النسايم |
اسمك ياابو متعب يوصف على الطود |
يقري ويذري عن هبوب السمايم |
الحمد لله عدت بالنصر والفود |
يا اللي ليا من غبت جبت الغنايم |
شبحك بعيد وياصل حدود وحدود |
وكم من محيط اجتزت لو كان عايم |
لك موقف بين الدول صار مشهود |
برايك وعزمك يا قوي العزايم |
ترقا سنود وجولتك عز وسعود |
انت السعد دايم يباريك دايم |
كل الأمل في خطوتك صار معقود |
ارض تجي فيها لها الحظ قايم |
مع ساير الأديان والبيض والسود |
وضعت للعالم مسير ودعايم |
لاجل العداله باذل كل مجهود |
ميقض ضمير اللي عن العدل نايم |
ذكرت في مجرى العدل عدة بنود |
تمنع مسيره فوق عدل القوايم |
ظلم البشر نتايجه ملح بارود |
قصر تفجر فيه يصبح هدايم |
شريعة الغابه وصايد ومصيود |
توخذ بها انعام بليا وسايم |
وشعبك جميعا هم لك عيال وجنود |
مسلم سعوديا مصلي وصايم |
بدا برابع عام ما عنه منشود |
وسم يغيث الناس والجو غايم |
صار المواطن له موارد مع عدود |
والمستوى في عاليات العدايم |
ومكافآت المبتعث جابها زود |
للخير في ساعة قدومك علايم |
وبك خصلة للحلم والعطف مشدود |
قلبك رحوم للقلوب الرحايم |
وشجاع كان السيف بالحرب مجرود |
ليا زما العايل على الخصم زايم |
على العلا خيلك سريعه بلا قيود |
وعن المطامن من صغر سن شايم |
يطول عمرك يا سند كل مضهود |
لعل ما نبدي عليك الهضايم |
وقبل الختام اكرر القول واعود |
قالوا بلا دعوه تعاف الولايم |
ليا طرقت الباب ما جاني ردود |
وانا بواديكم لي سنين هايم |
|
