جتني من الماضي ليالي قديمات |
تغافلني واسرقني ثواني |
ناديتهن من جابكن يا بعيدات |
خذيت من لوعاتكن ما كفاني |
بسكات خذني وانا جيت بسكات |
في غفلة جروحي خيالي خذاني |
نفس الشعور ونفس ذيك العبارات |
تنتابني لا مر طيفك وجاني |
شهرين مرَّن والمواجع جديدات |
لا قلت هانت دمع عيني غشاني |
يا ليل يا ليل الشقا والمتاهات |
خلاص انا ما عاد اسهر واعاني |
لا ضيق، لا دمع، ومآسي وآهات |
بدلت كل احزان قلبي اغاني |
طويت صفحة حافلة بالمعاناة |
ونسيت معها كل وجهٍ نساني |
فتاة عرعر |
|
