صار المثل إن فاقد الشيء يعطيه |
اعكس تصب واسأل عن النبع مجراه |
الناس موال التحاور تغنيه |
والبعض منهم هرجته عكس مبداه |
رايه صحيح وراي غيره يخطيه |
من قبل ما يسمع دليله وفحواه |
تهز راسك في كلامه تقول أيه |
ولا أنت خصمٍ له ومن جملة عداه |
لو كل من حاور خويه معاديه |
ما عاتب الولهان خله إلى جاه |
من يكرهك بالصمت كرهه يغذيه |
مثل القدر إلى كتمته غلا ماه |
واللي يودك صادق الراي يبديه |
والى استمع سرك عن شفاه خفاه |
راي ونقيضه كلها فود قل ليه |
من قال ليه فزبدة الراي مغزاه |
الجدي ضيه واهج الشمس يخفيه |
والى التفت العتمه حواليه شفناه |
اين تلوى مع هوى النفس للتيه |
واللي تيمم شيمة العدل ما تاه |
يصح راي ويخلف الراي راعيه |
والجوف قالوا تختلف فيه امعاه |
وأنا طريقي عارفٍ كيف اعدّيه |
أقول رأيي واجتهد فيه لله |
سالم السالم - بريدة |
|
