لاجفاك الزمان وحاصرتك الهموم |
دور اللي يشيل الحمل وشتك علاه |
واحداً لا نصيته في اللوازم يقوم |
قومته تبهج الخاطر وتروي ظماه |
ما يشيل الحمول ألا قوي العزوم |
والضعيف ضعيف ما ربح من نخاه |
الرفيق الوفي تلقاه عند اللزوم |
مثل بيت إلى احتجته يذري ذراه |
جاهزاً للدفاع وجاهزاً للهجوم |
يا الله تكثر أمثاله وتحيي نباه |
ثابتاً مثل ضلع (طويق) بين الرجوم |
لو تهب الهبايب ما تحرك حصاه |
وفاهماً في العوائد فاهماً في السلوم |
طيب الساس حراً ما يبي له وصاه |
ذاك والله رفيقي جعل عمره يدوم |
يسعد الله صباحه يسعد الله مساه |
أتشرف بمعرفته وأقول محشوم |
حشمته عندي أكبر من جبال السراه |
أذكره كل ما هبت علي السموم |
هو رصيدي وبنكي في بنوك الغناه |
يا عساهم تحت ماطاه كل الرخوم |
ويا عسى الله في هالدنيا يطول بقاه |
القصائد بمدحه تحتفل كل يوم |
ولو مدحته بشعري كيف ابلحق جزاه |
والمراجل صعيبه ما تجي بالعلوم |
ما تجي كود بالمجهود طول الحياه |
يتعب الرجل ما حقق كثير الحلوم |
والصبر يوصل الرجال غاية مناه |
والليالي تراها لو صفت ما تدوم |
مير يا الله توفقنا طريق النجاه |
سهل بندر المقاطي |
|
