يالله انا من جاير الوقت بحماك |
وأنت القدير اللي يحل الدواكيك |
يا عالي(ن) متعالي فوق الأفلاك |
يا المالك الواحد وحنا المماليك |
يا ناصرٍ موسى على قوم الإشراك |
يا مرسلٍ عبدك محمد مواليك |
يالله غفرانك وعفوك ورحماك |
وعطفك ولطفك وانتصارك لراجيك |
أدعيك في وقت الرخا واترجاك |
وأدعيك لا ضاقت علي المساليك |
يالله مكان(ن) مانطوله بلياك |
يا واحدٍ ماخاب من يتعزي فيك |
يا الآدمي ربك يحبك ويرعاك |
لا تترك الفرصه وعوّد لهاديك |
ولا صارت همومك ثقيلات وسماك |
رح دور القبله وإبعث دعاويك |
تراه بالمجان مابه استهلاك |
ولاهي بعبر أقمار, تاصل لمنشيك |
ولا تحسب إن الكبر ميزة مزاياك |
تراه لدروب الحسايف يوديك |
وأنذرك تغتاب المقفي فحذراك |
يعطيك سياته وياخذ حسانيك |
وأهل النميمه والمصالح كالأشواك |
قلع النيا بينك وبينه يداويك |
تمشي معك ماهو لطلعة محياك |
ذولا على شان المصالح تماشيك |
وعلى القرايب لا تلوح بشلفاك |
احذر ترى شلفاك تزرق محانيك |
واصبر ولو ان القرايب تبلاك |
صبرك على ربعك من العيب ينجيك |
وعيال عمك لو تبيعك وتشناك |
يجيك رجل من الأجانيب يشريك |
|
