وحيد أنا يا ليل منسي ومهجور |
أوفى اصدقائي شلة هموم وأحزان! |
لو خاطري يا ليل بالحيل مكسور |
ما حس بجروحي ولوعاتي انسان! |
محتار - ومشتت،،، وتايه - ومنثور |
ما عاد لي بين المتاهات عنوان |
يا ليل يغنيني ظلامك عن النور |
ديجورك الوافي ولا صبح خوّان |
لاصار بعض البوح موجع ومحظور |
ما كن لي رغم الألم صوت ولسان!! |
أضحك ويبكي داخل الصدر عصفور |
حاول يسافر بس ما معه جنحان |
والله لو جريت بالصوت معذور |
ولا كل من غنا من الوجد طربان |
وش عاد لو يجفاني الحظ ويبور |
هو من متى بالله جاملني وزان؟! |
بعض القصايد كنها شاهد الزور |
كم يذبحون الشعر في صفحة إعلان |
لعل شعري نبض أحاسيس وشعور |
مابيه لو ما كان صرخات وجدان |
عايض بن مساعد - (مداعب الحروف) |
|
