يالله يا سامع دعا من يناجيك |
يا فارج الضيقات منجي دخيلك |
يسالك عبد ميقنن بالرجا فيك |
أنت الأمل والملتجى والتجيلك |
أنت الكريم اللي كثار حسانيك |
نطلبك وفقنا لمنهج سبيلك |
يالآدمي لو شفت حيك وغاليك |
اللي تعدى يم جارك يجيلك |
يوم فرح وتعيش باذكار ماضيك |
ويوم من الدنيا سريع رحيلك |
يبقى عزيزك بازرق الدمع باكيك |
وقبله بكيت امن القرايب خليلك |
سكناك بيت دون باب وشبابيك |
أقرب قريبك يم بيتك يشيلك |
عايش وحيد لا حبيب يواسيك |
ألا دعاك وسجدتك وتهليلك |
لو كان بعلا الصوت ناداك داعيك |
ما تسمعه والى عملته نزيلك |
سنة حياة وما وطى الناس واطيك |
يا كيف تبغى ميلها يستويلك |
أصلح معا مجري الهبايب مساعيك |
من شان تفرح يوم تلقى حصيلك |
عبدالله بن فهد آل فراس الصخابرة |
|
