يا وجودي على اللي جنسهم ما لقيته

انطوى جيلهم وامسوا بوسط اللحودي

لا حداني زماني والحمل ما قويته

يا وجودي عليهم وينهم يا وجودي

كل رجمٍ طويلٍ بالقوايل رقيته

تقل كني على روس الرجوم محدودي

اعتليته وانا يا ليتني ما اعتليته

مع طريقٍ وحل عسرٍ نزول وصعودي

معد تلقا شجاعٍ ينتخي لا نخيته

ما بقى الا مصانعة الثعل والقرودي

لا تحزم بمن لا يحتمي طنب بيته

واحسايف على اللي بالملاقا وسودي

يا لله انك تسمّح لي طريقٍ نويته

النوايا مطايا يا رحيمٍ ودودي

انت عالم خفاي اللي خلقت ورعيته

عالمٍ لا بلينا يدبلون الكبودي

ليت الأيام تخبرني عن الغيب ليته

كان اعرف الصديق من العدو اللدودي

اكثر الناس منهم حبل ياسي طويته

لو جدود الرخوم البايرة من جدودي

بعض الازوال حية بعد الافعال ميتة

وش ندور ورى نذلٍ حقودٍ حسودي

كم عريبٍ يذكّر مع هل الطيب صيته

والردي لو تنصّب ما ذكر منه فودي