قال الذي له مع الدنيا تجاريبي

خمسين عاما من الدنيا مجربها

مراحل العمر في دنياي تجريبي

واسعى مع الأرض وامشي في مناكبها

والعاقل اللي تفيد به التجاريبي

اللي حصله دروس (ن) واستفاد ابها

دنيا الفنى ما بها غير التعاجيبي

دنيا عجيبه ولا تأمن تقلبها

يوم (ن) ترقيكم في روس المراقيبي

تصفيلها أيام وأيام (ن) تخربها

دنيا غرور (ن) وصفها عالم الغيبي

وحذر عباده جميع (ن) لا تغرا بها

يالعبد ابا نصحك لله كان تدريبي

نفسك على طاعة الرحمن دربها

وصل الفرايض بتأني وتأديبي

عمود الإسلام ومحمد وامرك ابها

تنجيك يوم الحساب من اللواهيبي

ترى الخلايق لها رب (ن) يحاسبها

واركان الإسلام كملها بترتيبي

تسلم من النار والجنه تفوزا بها

وجنب دروب الردى واحرص على الطيبي

وتجنب الدون والاخيار صاحبها

لا تصحب الا عطيبين المضاريبي

أهل فعالو (ن) تنومس من يصاحبها

وابعد مقامك عن أهل الشك والريبي

هل الحسد والنمايم لا تقر بها

اللي هوايتهم شذب العراقيبي

اعراض الأجواد مهنه تستلذا بها

يا الله يا رب لا تجل لهم صيبي

هل النمايم لعل الرب يذهبها

وترى لربعك على الطيب موا جيبي

كمل مواجيب ريعك لا تشح ابها

اكثر لهم لا نصوك أمن التراحيبي

وليا نصتك الرفاقه قم بواجبها

لا تستمع في مفتلت الاذانيبي

اللي ذلوله مع الفرقان يشعبها

بين الرفاقه يشبون المشاهيبي

وليا سمع زلة شمر وجاك ابها

وعن درب ربعه يصد وفيه تجنيبي

دروب ربعه قليل العرف جنبها

هذا بعض ما اتضحلي من تجاريبي

والناس عني تكفيها تجاربها

وصلو عدد ما تشاف نجوم واتغيبي

على نبي (ن) رقا باعلا مراتبها