عبر الشيخ الشاعر ابراهيم بن ناصر الزامل الحوشان من أعيان محافظة المنزاحمية عن مشاعره عند سماعه خبر وصول خادم الحرمين الشريفين حيث قال هذه الأبيات:

يامرحبا باللي عن المملكة غاب

خذ له شهور وكنها عدة سنين

والشعب فرح بجيته عقب ماطاب

فرح بشوفك يالبطل يا أحمر العين

والعاصمة تزها جديدات الاسلاب

ومزخرفه بزهور ورد ورياحين

يامرحبا به عد ماهل سكاب

وعداد من صلى وزار الحرمين

روضة خريم ولفحها نبت الاعشاب

ازين من امريكا وباريس والصين

محبتك بقلوب شعبك لها أبواب

متفتحته باخلاص والله وفرحين

يامنفذ شرع الله بحق وكتاب

ياخادم البيتين يانصرة الدين

ياسور كل المملكة درع وحجاب

حامي حماها من جميع المعادين

في خطبة الجمعه على رأس محراب

لما دعى الامام قالوا له أمين

هذا صدوق الحب مافيه كذاب

ومن لاصدق بالله عساه يعمى العين

صقر العروبة لعتلى الرأس مرقاب

تخضع له العقبان مثل الكراوين

خوفاً من الصدمة ومن رأس مخلاب

وعسى المخرب ينقسم راسه اثنين

الشله اللي جوك من كل الأقطاب

من جاهل وفاشل وبالمال مغرين

واللي موهقهم مغالين وأجناب

شوعي يهودي من حثالة صهاين

نايف هزمهم جعلهم ضرب شباب

المارجين الخاينين الشياطين

الله يذهب كل خاين ومغتاب

من خان في بلاده تراهم ملاعين

نعتز بآل سعود عصمان الاشناب

طوال اليماني ملحقين المخلين

وإخوان نورة هم عدى كل حراب

رمز الجزيرة من ملوك وسلاطين

وصلوا على محمد عدد نبت الأعشاب

نبينا الهادي أمام المصلين