يلح القلب.. مشتاق لحبيبه

طواه الهم.. ما يقوى مغيبه

ولا هو اللي دلْه.. لكن تعشم

عسى الايام.. واقداره تجيبه

انا اذكر كل تفاصيل اجمعتنا

بماضينا الى حزه قريبه

هو اسنيني وهو حب الطفوله

الى وقتٍ ظهر بالراس شيبه

خدين الروح ومناي ورجاتي

ابي شوفتْك والله باللي هي به..

يا شين الوقت ويا ثقله بدونك

لعب في حسبتي ربي حسيبه

غديت احتاط.. واخشى لا اتوجد

وصوتي امن الوجع يسمع نحيبه

وزهقت العمر.. وارهقت الأماني

ولحقني من رداة الحظ خيبه

بعد ما استاثمت فيني جروحي

وفيني ضاقت الأرض الرحيبه

على نفسي قفلت الدار قاصد

اداري حال قلبي وانزوي به

اخاف الياس لا منه تعاظم

بوجهي يبان حزني والمصيبه

يا وين اطلق من الوحده سراحي

ولا فاد المولع شق جيبه

تمهل فيك لا تخيب الرجاوي

قبل ما البعد عني ترتضي به

ابي نصمل ولا نرضخ طلبتك

لدنيا ظروفها دايم غريبه

واكيد الآدمي ما يآخذ الا

من ارزاقه سوى قسمة نصيبه

ولكن ربنا... اكرم وارحم

ولا خيب رجا من يلتجي به

ولك مني.. اعيش العمر كله

احفظ الود عن عاذل يعيبه

الين الله يكتب لي وييسر

لقانا والوصل من بعد غيبه