الغلا اللي له معااليق الخفوق حيامي

كل عرق من العروق اليا ظما يروى به

ما بقالي من غرامه غير جرحٍ دامي

لاعبس وجه الزمان آموت به واحيا به

كل ماسجّ الفكر في عالم الاحلامي

واستراح البال هاجوس الخيال ادوى به

تاخذه ذكرى غلاه لسالف الايامي

والخفوق يسوقه الشوق لحنين احبابه

وان هما زود الغلا هبّت به الانسامي

وانتشا قلب العنا والشوق شرّع بابه

زادت الفرقا غلا والشوق جمره حامي

والحنين لفرحة اللقيا يحث ركابه

أتيمم وجهة دروبه واسوق اقلامي

وين ماوجّهت بالحرف أعتلي مرقابه

كود ينسيني شقاي ولوعتي وآلامي

هاجس الجرح العتيق اللي تفوح اطيابه

كل عرقٍ من عروقي للمواصل ظامي

وكل جرحٍ فزّمع نبض الغلا غنى به

ما بقا بي شي حي لشوفته ما هامي

غير نسيانه وكسرة خاطري وعتابه

ما اقد رانسى أغلا همومي واصدق الاوهامي

لو قضيت العمر اقاسي لوعتي باسبابه

كيف ابنسى حب من قدره بقلبي سامي؟

لاسرى فكري بطيفه زارني بغيابه

وين ما وجّهت وجهي صورته قدامي

أكتبه واقراه حبٍ ماطويت كتابه

بس قومي ياهجوسي وان بغيتي نامي!!

لوغرس وقتي بقلبي دون وصله نابه

والله ليبقى غلاه بخافقي مترامي

لني اليا جيت ابنسى كل طاري جابه!!