القيظ ركب علينا حر ملهابه
يا سرع الأيام يا مكثر تقلّبها
مبطين ماعاد شفنا البر وترابه
والطير مربوط والأيام نحسبها
وسهيل كنّه من الأحباب في غيابه
واليا طلع فرحت الصقار يجلبها
وجات الهبايب بنو الوسم جذابه
وصارت علوم الحيا كلن يجيك بها
لعل سيله على الصمان وحرابه
قمة سنام الدير والكل يرغبها
واليا كساها الربيع تشابه الغابه
جيانها والفياض وما يحيط بها
الطير توّه وحش جابوه بقطابه
من خيرةٍ جابها الطاروح جالبها
عابيه للي عصت في الجو لعابه
يلحق عليها طياره لين يعطبها
من السماء حولت شلو(ن) بمخلابه
ومن الشراسه تطب الأرض قاضبها
مع خوة اللي على الشدة تعزوابه
كلمة نعم من فعول الطيب كاسبها
إليا نصاه المسير فاتح(ن) بابه
ماسكّر الباب والشاشه مركبها
يفدونه اللي لجمع المال حسابه
لو كثر ماله فعول الطيب جنبها
