يابوي أنا طالبْك يا بوي لَتْروح

مالي بهالدنيا حبيبٍ يسلّين

ولاّ ترى يابوي باعلّي النوح

واقول: ردوا لي جواد الميادين

فرقاك شبّت نار في داخل الروح

ما تنطفي لو يفتدوك ابْملايين

دنيا غرورٍ ما بها ضحك وفْروح

لو بسّمت لك يوم، ترجع عل الشين

مات الذي بالخير والطيب ممدوح

صيته علا كل الرجال الميامين

مات الذي شيّد له العز بصروح

صرح الكرم والجود، وحب المساكين

العين تدمع والحشا منْك مجروح

والنفس ضاقت والمواسي قليلين

ودي ابْعمرك فاق عمر النبي نوح

مير المقدّر لازم اتشوفه العين

رضيت بالمكتوب والصدر مشروح

والموت دربٍ كلّنا فيه ماشين

بِذن الولي مسْكنْك في عيش بحبوح

وسْط الجنان امجاورٍ للنبيّين

عبدالعزيز محمد الدباسي- بريدة