برى الجرح والا مابرى مقتفيه جروح

مقادير مير الله يساعد على اللي جاي

ياوجداه وين اللي يخفف على المجروح

يعذل علي ولا يحاول يرد بكاي

منول ما اعد ولا اعتبر غير روحي روح

أناني ولا آخذ راي والا أعطي أحدٍ راي

أذار الهبايب وان لمحت البروق تلوح

تبعت الحيا لوديرته ذيبها عواي

جوازي بجيبي للسفر والفضا مفتوح

مغامر ولا أنشد وش بقي معي في مخباي

أهجرس واجر الصوت وادعي حمام الدوح

واعلق على صدر الورق من يجيب دعاي

أشوف الحمام ينوح ما اقول ليه ينوح

واشوف الجريح يصيح ما امد له يمناي

على رغبتي من دون تخطيط أجي واروح

لحالي على فالي واغني على ليلاي

لكني ما اساوي نادر العش بالسلتوح

ومن مدلي يمناه ما امد له يسراي

هذا قبل والا اليوم يا صعب بعض البوح

بدا هم قلبي وانتهت مرحلة سلواي

تمكن وشيد بين حدب الضلوع صروح

على من خلقني من عدم منتهى شكواي

رزاني زماني في قريب وفي ممدوح

وتناسيت نفسي من مصابي ومن بلواي

فقدت القليل وقلت ما صابني ساموح

وفقدت الكثير وحسبي الله على دنياي

واعزاه كم صليت مره على طحطوح

حداهم ليامنه طرالي يجيب اقصاي

يضيق الوطا ويضيق كون الله المفسوح

ولولا الصبر لتفيض روحي على مركاي

تجرعت كاس الصبر لوهو كما الذرنوح

وتحملت حملٍ دق حيلي وهد اعضاي

بنادم ولالي درب عن ما كتب فاللوح

بغض النظر عن عبرتي وزعلي ورضاي

ياعالم لوإن المنحة اللي مع الممنوح

أخذها الكريم اللي عطاها قبل ممساي

يامنجي من الطوفان والما سفينة نوح

نجاتك نجاتك ياملاذي ويارجواي

فراج الكرشمي