الشاعر الكبير عبدالله بن دهيمش بن عبار العنزي يضّمن المحاورة الآتية إيجابيات نظام ساهر وفي المقابل بعض الملاحظات التي يصيغها بأسلوبه بين نظام ساهر ومواطن سعودي.
-1 قال المواطن:
ساهر سهر يسهر لجمع الدراهم
ما راف بأحوال الضعوف المساكين
أهل الجيوب الفارغة هو بلاهم
كم معسرٍ مع فاقته حمّله دين
-1قال ساهر:
ما كان قصدي مال مار أنت واهم
الحمد لله عادل ومنهجي زين
قصدي بتقليل الحوادث أساهم
وأثبت جدارة مهنتي بالبراهين
-2 قال المواطن:
يا ساهر المخلوق ربي وقاهم
اللي لوجهه يسجدون المصلين
ما أنت الذي عن المقّدر حماهم
حماهم اللي كوّن الخلق من طين
-2 قال ساهر:
ترى الرجال اللي بعيدة مداهم
يثنون ما داموا على الكون حيين
أني ردعت عيالهم عن خطاهم
وساروا عدال بمسلك الحق ماشين
-3 قال المواطن:
من لا اعتدل ممشاه عض الأباهم
ولا فاد قول الحيف أو قول ياسين
اللي أنجبوه الله يجبر عزاهم
رب الخلايق يرحم الحال ويعين
-3قال ساهر:
عندي فلاش لكل مسرع يداهم
وسط المدينة من مشى فوق سبعين
حتى بسريع الطرق للقوم ناهم
صدت الذي يجتاز ماية وعشرين
-4 قال المواطن:
جيت الشباب وجايح البين جاهم
يا ويلهم في كل سرعة مجازين
لجوا وضجوا منك وأصبح جداهم
بس الدعا والهرج وسط الدياوين
-4 قال ساهر:
مهما دعوا ما أشكل عليه ادعاهم
لابد ما يخضعون لأمري مطيعين
واللي هجوني بالقصيد أهجاهم
أنظم وأرد الصاع بالشعر صاعين
-5قال المواطن:
يا ساهر ارفق بالضعافي تراهم
متعطلين جيوبهم ما بها شين
الوقت من شح الموارد وطاهم
مامن حلال ولا أملاك وبساتين
-5قال ساهر:
لومك على اللي يبالغون بغلاهم
زادوا على أسعار السلع بالدكاكين
يا ليت لو هم يكتفون بغناهم
رصيدهم وسط المصارف بلايين
-6 قال المواطن:
اللي أغلوا السلعة مشيت بسراهم
مجهد وبفلاشك جمعت الملايين
أسرع من الطلقه فلاشك رماهم
تلبد لهم وسط الشجر بين سيدين
-6 قال ساهر:
اللي من فلاشي تكّدر صفاهم
في ما مضى كانوا عن الدرب لاهين
لولا فلاشي بالغرامه وداهم
كان استوت للضالين المضلين
-7 قال المواطن:
أهل الرصيد الميسرين وسواهم
هيهات ماهم عن مغارمك دارين
لكن ضعوف الناس تبحث خفاهم
وش يعمل اللي راتبه حدر الألفين
-7 قال ساهر:
أهل الغوى والطيش نلعن ثواهم
حيث إنهم في حق الأجواد مخطين
ما أعف أنا عنهم ولا أتبع هواهم
ولا أجامل اللي يخالفون القوانين
-8قال المواطن:
يا ساهر السهران ليتك تفاهم
وليتك تعامل ساير الناس باللين
ليتك تعف ولا تخيّب رجاهم
تغضي مرافه ما تقل شافت العين
-8قال ساهر:
مالك ومال أهل التهّور عساهم
ما يرشدون الطايشين المجانين
أوذوا جميع المسلمين بغثاهم
والواجب أنك ما تشفّع لطاغين
-9 قال المواطن:
ترى الكهول اللي تخالف ضناهم
هم يدفعون مخالفات الشقيين
شيابهم ليتك تكّرم لحاهم
مع الكبر سكر وضغط وطواعين
-9 قال ساهر:
افهم جوابي وأنت مدرك وفاهم
بالصدق ما هرجي هقاوي وتخمين
أنا خصيم اللي تزاود عياهم
شيبان ولا من صغار الغلامين
-10 قال المواطن:
يا ليت كل الطايشين تحصاهم
وياليتهم وسط العنابر مساجين
المفسدين أهل التهّور جزاهم
غير الغرامة جلد مع سجن عامين
-10 قال ساهر:
شلة هل التفحيط هم وزملاهم
اللي يحطون الشوارع ميادين
لازم نرد أهل الغوى عن غواهم
بالحد الأقصى وندبل الغرم ضعفين
-11 قال المواطن:
نطلب عسى رب العباد أيهداهم
ونعوذ بالله من رجيم الشياطين
اللي اشتكوك وطالبوا من عناهم
وش عاد لو معهم عن الغير تأمين
-11 قال ساهر:
ما دام فعلي عن جهلهم نهاهم
وعقب الجهل صاروا لك الله صاحين
أنا شفاتي يرتفع مستواهم
مثل ثقافة شعب لندن وبرلين
-12 قال المواطن:
أخبرك كل الناس غاية مناهم
ترجع على مصدرك بخلال يومين
لو كان تسمع بالمجالس لغاهم
كان ارتحلت وشلت بالحال هلحين
-12 قال ساهر:
يامن تقول الناس ساهر وساهم
أدخل على الله ما ظلمت البريين
اللي أومروني طعتهم ما عصاهم
وأنتم عليهم ضدي اليوم شاكين
-13 قال المواطن:
شعب الجزيرة للحكومه ولاهم
أجواد في كل المواقف وهادين
يمشون بأمر ملوكهم وزعماهم
للي على عز المواطن حريصين
-13 قال ساهر:
كانك صدحت بعالي الصوت زاهم
وتقول كل الشعب مثلك منادين
أزبن على اللي جارهم ما شناهم
نوادر شخوص الرجال المسمين
-14 قال المواطن:
نزبن على اللي نلتجي في حجاهم
اللي على شعب الجزيرة سلاطين
نلوذ عن صلو الهجير بذراهم
نسل الملوك الطاهرين التقيين
هم ذخر اللي من ظيم ساهر نخاهم
حرز الوطن بيض الوجوه الميامين
حكامنا جادوا علينا بصخاهم
من فضلهم ننعم عساهم قويين
حكامنا اللي الشعب فاز برضاهم
سادوا بعدل وطبقوا منهج الدين
حكامنا اللي كل معسر نصاهم
اللي ربينا في ذراهم عزيزين
الله من علوم الفضيله عطاهم
ساروا على منهج ختام النبيين
رب الملا من شعب نجد اصطفاهم
نسل الزعيم سعود شم العرانين
عسى ولي الكون يرفع لواهم
رمز الجلالة والشعار أبو سيفين
وعسى ولي الكون يدحر عداهم
ويفكهم من شر كيد المعادين
