يا ناس راع الحب لو قال أبا اتوب

تراه مثل الطفل نفسه ردية

لا شاف من يظهر له الهرج مقلوب

تطري عليه ايامه الاولية

المستريح اللي عن الحب محجوب

ما احدٍ تولع به ولا له بغية

يا ما ذكرنا من عجاريف وعجوب

في وقتي اللي فات تطري عليه

ما دك في قلبي من الهم دالوب

همي فراق مقرمزات الشفية

لو راس مالي بس بشتي مع الثوب

اغنى من اللي يملك القيصرية

واليوم لو عندي حلال ابن يعقوب

غناة تالي العمر ماهي حلية

كني مدير البنك والمال محسوب

امانةٍ للناس ما هوب ليه

الى توادع كل غالي ومحبوب

حطوه بين العايلة بالسوية

هذا طريق الناس والاجل مكتوب

كلٍ يبي من والده له وزية

لا مت كلٍ شال حقه على صوب

(الطيّب اللي يشترى لي ضحية)

يالله عسى مانيب بالنسل مغلوب

ويا عل ذكرانا مع الناس حية

هذا وصلوا عد ما ذكر مكتوب

على النبي المعصوم من كل سية

مرشد البذال