قصيدة موجهة من الشاعر بدر الحويفي للشاعر مبارك ابن منير العوني الحربي.. يقول الحويفي:
يا مبارك الصقار قرب هـــبابه
والطير قرنس واكمل الريش تكميل
والوسم له يومين داخل حسـابه
الله لا يحرم وطنا من السيل
يالله بنـــو يوم يــردم ربابه
توابعـــه مثل الجبال المظــاليل
يومر على غسل المحول انصبابه
في قدرة الخالق يكيله مكاييل
يحيي الهشيم اللي يبس في ترابه
يبست عروقه والهوا شالته شيل
يبس الشجر والقاع والعجز صابه
وضاقت على راع الحلال المهازيل
راع المواشي زادها من زهابه
يرهن لها الذمة ويشري لها الكيل
نشف الثرى والبر مقحط جنابه
واللي حـــواله دون ذاق البهــاليل
يالله بدعوة مســـلم مستجابه
من عابد له نافلة تالي الليل
يطلب بها ربه ويرجي ثوابه
وقلبه نظيف من الريا والتضاليل
رزقه حلال وملبسه واكتسابه
ما للربا بحساب رزقه مداخيل
دعواه عن عجم البهايم نيابه
اللي شكت من قوتها فترة الحيل
يفتــح لهــا رب الســـموات باه
دون السما ما يعترضها عراقيل
نطلب مطر رحمة ثقيل سحابه
في البروق تلوح مثــل القـــناديل
ياخذ ثمان ايام حسبة اوجابه
دقـــاق رفاق زلــوفه هماليــل
واليا انتهى الثامن وعزل ضبابه
نهار تاسع باذره كنه النيل
والعصر لامن المولع مشى به
يغيب هوجاسه وينسى الولاويل
لا صاغ له فنجال عذب شرابه
وزنه غدير وشب نار المعاميل
وجذب لهن جمر كثيف التهابه
والكيف طاب وساقها بالــفناجيل
على نشاما ماخلطهم قلابة
خفاف النفوس رجال ماهم دعابيل
ودارت سواليـــف مزوح وعــجابه
وطرايف تشفق عليها الرجاجيل
هذا منى كل شخص وادابه
وكل على شبحه يصوغ التماثيل
الا الذي طرد الولع ما شقى به
ولا يعجبه شوف الزهر بالهذاليل
مرتاح لو طاح المطر ما درى به
لو تنشده ما يعرف الجدي وسهيل
بدر الحويفي
وهذا رد الشاعر مبارك بن منير العوني الحربي
يامرحباً بالخط واللي عنا به
أهلاً هلا في خط ريف المشاكيل
خطٍ لابو سلمان يامرحبا به
ارتاح له واشتاق رد التماثيل
من شان لاتابعت وضعه وادابه
بعيد عن منهج هل القول والقيل
رجواه للخالق تزيده مثابه
والكرب ينزل له من الرب تسهيل
ما ضاع من رب العباد اعتنا به
مكفول عند اللي تكّفل اسماعيل
يابدر عسى ان دعوتك مستجابه
في رادة اللي بأبرهه سيّر الفيل
ينزل لنا وقع المطر من سحابه
من مدلهمٍ دافقٍ تالي الليل
تردم مقاديمه وتمطر عقابه
جوه سكون وساق سيل على سيل
وليا اشرقت شمسه ورفع ضبابه
والسيل حول من عواليه تحويل
ينساح قلبٍ ما يعالج صوابه
اللي يعاني من زمانه غرابيل
يا بدر ماله بالحضاره كسابه
لا كاسبٍ راحه ولا من محاصيل
لا صار رزقه بالحضاره اطلابه
صبرٍ على بعض الوفا يبهت الحيل
كم واحدٍ له غايةٍ ما حكا به
يخاف يشرب بالسوالف فناجيل
ويعيش في وجد اليقين وثوابه
ويطلب اليا نامت عيون البهاليل
فزعة فرج في ساعة ماحترابه
تبري القلوب الهايمات المغاليل
رحمه من المولى ويرفع عذابه
عن ناس تاصل بالجماله مواصيل
هذا اقتراحي يالحويفي ومابه
قلبٍ لبيب الا تجيبه ولاويل
والا البليد يعيش ماحدٍ درابه
مرتاح ماله باللوازم مداخيل
والطيب وافعال الردى ما تشابه
والجود يوجد بالرجال الحلاحيل
واللي تقول ان المطر ماشقا به
عايش بغفله واليالي مقابيل
لابد من يومٍ يصًفي حسابه
ويشيل من حيل الدهر مثل ماشيل
والله عليمٍ في خطاه وصوابه
ويلقى حسابه يوم ينفخ اسرافيل
مبارك بن منير العوني الحربي
