تل قلبي تل ركب الهمهية

يوم خف الشيل وشنونه طووها

في لهيب القيظ صبحه مع عشيه

بالمطارق والعراقيب الهدوها

والموارد خوف والدار اجنبية

والدروب العوج معها سخروها

ما طرقهن في قديم الوقت فيه

بالمغازي والمناكيف اتعبوها

منوتي ريحة هوى نجد النقية

في خلا منه الجوازي جفلوها

ما حلا من عقب مزنه عقربية

جرة العساس فيها ما لقوها

شيدوا بيت الشعر بارض عذية

شف بالي ربعته يوما رفعوها

طوقه نبت الخزاما والنصية

في رياض بالقوايل ما رعوها

وانزلوه اللي يمانيهم سخية

وعلقوا ضو المنارة واشعلوها

واحتما محماسهم باغلا شريه

والدلال الصفر بالصالي شوووها

وقدمو فنجالها مثل الهدية

بعد ما بالهيل الاخضر بهروها

دق نجر يجذب الساري عويه

ما توزو بالمطابخ وطحنوها

يوم جيبت مثل مجهول الهوية

ما تسر ونارها ما شاهدوها

دلة لو قلطت بالطوفرية

ما تساوي اللي على الملة جذوها

تجمع الظفران ورجال الحمية

والسواليف القديمة حدثوها

في البطوله والخوي ويا خويه

من عهود جدودهم ما زيفوها