يابو محمد بحّ صوتي وأنا أصيح

وماكن حولي نابه العقل يوحي

لمّحت واجد ثم صرّحت تصريح

لعل يسمعني بعيد الشبوحي

ولا سمعت الا صدى الصوت والريح

وروحي تجاوب ونّة آهات روحي

يا حظ منهو ميّت القلب ومريح

يقبل زهيد العيش لو هو سموحي

المشكل إن القلب صعب المشاويح

وإني على حفظ الكرامه شفوحي

ما أرضى لنفسي هيّنات المراويح

ولا خلقت لطامنات السفوحي

نفسي عزيزه ترفض الذل وتشيح

عما يهين ولوه بلسم جروحي

طرّاه سلهام العيون الذوابيح

برض الكنانه يوم حنّا نسوحي

ريح النفل يفرق على ريحة الشيح

وصافي غدير ولا بروقٍ تلوحي

الأمير الشاعر - سعود بن بندر -رحمه الله-

***

أسمعك أنا وأقوم يا شيخ وأطيح

أمشي على صوتك وأسوق السروحي

لا هنت يا ملمّح هقاويك تلميح

صوتك يوقّظ نايم أفنود دوحي

على الملامح شفت عزٍّ وتبريح

ومعانٍ ظللتها سقف روحي

وأقول يا ملقّح معانيك تلقيح

عشقتك من بكر المعاني طموحي

ولو يسمعون الصوت كل المجاريح

ما مات وجلٍ بين صمتٍ وبوحي

يا طير عينك ما تغر الملاويح

في كفّ ميّاحٍ بشلوه يموحي

لا شك ربك خالقك للمراويح

وراسك على طلب المعالي لحوحي

الحر عشّه فوق روس اللحاليح

مع الكواكب دون مرقاه صوحي

لقيت ما تلقاه منك السواميح

أكبر عيوبك للموالي نصوحي

الشاعر - راشد بن جعيثن