الحلم كسب ومنهجه نهج الأخيار

ولا كل رجالٍ تناله يدينه

وهبه من الوهّاب علاّم الأسرار

يبين ويعرّي خفا مدّعينه

لو كل زلّه ضدّها نفتح النار

ما صارت ضلوع المراجل متينه

يموت بذر العفو في نفس بذّار

ويشقا ولا يلبس ثياب السكينه

ادمح ولا تجمع طويلين وقصار

تراك لا بدك تذوق الغبينه

ياما أشوف من البلاوي والأخطار

ما يجعل نفوس النشامى حزينه

عوجٍ عليها طول يدها من العار

تهزّ قسوتها العقول الرزينه

مرّرتها مثل السبايا بمضمار

وحصنت نزواتي بحصن الحصينه

خذيت لي عنها مع الطيب مشوار

ودلهت واعتقت برضاي الرهينه

رجل أترفع عنه حشمه ومقدار

ورجل أترفع عنه قصدي بأهينه

المجد يبقى له مع المنصف آثار

لو جسم منهو سطّره دافنينه

والبحر ما يجهل خوافيه بحّار

يبحر على صدره بصدر السفينه

والبر لا جاه المطر ينبت أثمار

ويصير قدره فوق قدر المدينه

قلته وكسب الحلم منهاج الأخيار

ولا كل رجّالٍ تحوشه يدينه

عبدالعزيز الشهيل