طال السكوت وفيك صمتي طال والتفكير طال

والناس نامت ليلها والهاجس اصحاني ونام

كلٍ على جمة مديحك ورّد طوال الحبال

وانا مثل طفلٍ عجز ياصلك من كثر الزحام

تسابقوا في مدحك الشعار واللي قال قال

والقول مهما كان ما ياصل ولو ربع المقام

من وين ابدخل في رحابك واقرب العد الزلال

والناس حولك فوج يتبع فوج وركابي حيام

ان جيت ابقرب منك ردتني مقادير الليال

وذنوبي اللي كل ما تطري لي- ايموت الكلام

رجلي مقيدها الخطا وذنوبها كبر الجبال

رغم الخجل والخوف يا خير البرية والأنام

يممت نحوك يا رسول الله وشديت الرحال

الشوق يدفعني وتخجلني خطاياي العظام

حتى وقفت بقبرك الطاهر ودمع العين سال

فوق الشفاه اللي تلعثم با الصلاة وبا السلام

الدمع حول طوع ما ناديت يا دمعي تعال

والعين ما تنلام لو تبكي ودمعي ما يلام

الله واكبر قالها المذن وذكرني بلال

با المسجد النبوي وبا الاقصى وبيت الله الحرام

اختارك الله للرسالة بعد ما عم الظلال

واشعلت مصباح الهدايه من غياهيب الظلام

واذوك اهلك وحاربوك وكثروا فيك الجدال

وفي شعب عامر حاصروك بلا شراب ولا طعام

يا كثر ما قالوا عليك علوم والله ما تقال

يا خير من رجله وطت ما بين زمزم والمقام

صبرت حتى بدل الله حالة الدنيا بحال

واستقبلوك انصار يثرب والكرم طبع الكرام

حتى انتشر نور الرسالة فا الجنوب وفا الشمال

واديت امانتك العظيمة با الكمال وبا التمام

قبلك عرب كنا ولا نعرف حرام ولا حلال

وبفضلك اصبح قسمنا من ذروة المجد السنام

يا نبض روحي يا حبيبي كيف يسعفنا المقال

وانت النبي الهاشمي المصطفى وانت الامام

يا سيدي وانت أعظم من الشعر وحروف المقال

جيتك وانا عذري صلاتي والتحيه والسلام

حمد العصيمي