رحمك الله يا نايف ابن عبد العزيز... آمين
لو إن الموت رجال احتمينا بينك وبينه
ولكن العزا بإذن الله إنك من هل العينين
بكت من خشية الله عين وتحرس أمننا عينه
نعرفه لكن انك انت يا ربي تعرفه زين
وتعرف كم وكيف أفنى بخدمة دينك سنينه
لك الله ثم يا نايف دعا المستضعف المسكين
لأنك كنت أبوه وفزعته وأمنه وتأمينه
لك الله ثم يا نايف دعا من خادم البيتين
ليا ناظر يمين ولا لقى نايف على يمينه
لك الله ثم يا نايف دعا سلمان والإثنين
عزاهم أحمد اللي كنه أنت بحزمه ولينه
لك الله ثم يا نايف دعا شعبك من الجنسين
من أحرار الوطن وانا سمعت دعا مساجينه
يا كم سامحتهم واطلقتهم لو إنهم مخطين
ومن فاته عفو سامي يفكه عفوك بحينه
عرفناك وعرفنا الأمن لأنك والأمن وجهين
لعملة واحدة والأمن من أسهل قوانينه
حليم وحازم وصعب وسهل يا رب وش هالجين
جعلها الله تختال وتمشّى مع شرايينه
بكوا فرقاك من بالأرض إلا زمرة الغاوين
مساكين الرجال ومع أثرهم كم مسكينه
فقدك الغيم وزهور الرياض وطيرك الشاهين
يا كبر مصيبته من بعد ما كسرت جناحينه
فقدك أهل الإدارة والسياسة والسياسيين
وبلدك اللي يبي يشهد لك التاريخ تحصينه
حمل قلبك همومٍ شايكة وأهمها التوطين
لإجل ابن الوطن ينعم ويهنأ في بساتينه
ولما حاول الإرهاب يغرز بالوطن سكين
ثنى دون الوطن وارتد للإرهاب سكينه
رحل نايف ولكن الأمل بالله ثم الحيين
من اللي يحملون بدمهم جينٍ مثل جينه
لنا بسلمان هقوه عمرها ما تحتمل تخمين
مضامين الكتاب القيّم تبان بعناوينه
ولي العهد سلمان الوفا اللي محتزم عامين
بجنب أخوه لين الله سبحانه قضى دينه
وما دام أحمد مشارك نايف التطوير والتحسين
فلا والله تفاجأنا بتتويجه وتعيينه
بقي كالجندي المجهول يحمي مملكتنا سنين
يا طيبه من قرارٍ ساميٍ أدى لتمكينه
درس في مدرسة نايف بإتقان وتفاني... لين
تسلّم راية الأمن السعودي منه بيدينه
وإذا التلميذ وأستاذه بشر ما هم بعاديين
لنا بسعود ومحمد من العينه بعد عينه
وحنا جنودكم ودروعكم عند المقام الشين
عهد لجدودنا وآبائنا من قبل معطينه
نوقف وقفة الأيّوبي بوجيه الصليبيين
ولا نهتم في صاحين الأعداء من مجانينه
ما دام ملوكنا في نصرة الإسلام متواصين
لهم منا الوفا والبيت بإذن الله حامينه
الشاعر العقيد الدكتور/ أيوب بن حجاب بن نحيت
