يا دار عمت في نواحيك الاحزان
وعمت جميع الناس حضر وبوادي
ما جفت ادموعك على فقد سلطان
وتجددت من يوم نادى المنادي
ينعى رحيل اللي له الأمن عنوان
نايف ولي العهد راع المبادي
الفاجعة كبرى وهزت لها أركان
فقيدنا ذا اليوم ماهوب عادي
فقيدنا حقق لنا أمن وأمان
وصان العهود إبعون رب العبادي
وفقيدنا رجل حليم وحنان
ماهوب متسلط حكيم وقيادي
أمن المواطن هاجسه وين ماكان
وأمن المواطن عند نايف ريادي
الأمن والأمان مطلب للأوطان
وأمن الوطن في حكمته عم وسادي
نرفع تعازينا لسلايل إكحيلان
عبدالله اللي كلنا له إنفادي
يا خادم البيتين حنا لك أعوان
وحنا جنودك بالرخا والشدادي
وكل العزا للوافي الشهم سلمان
نعم العضيد اللي سماته مدادي
حامي وطنا من حقود وخوان
قوة دفاع إمكمل بالعتادي
وكل العزا للي خلف طير حوران
أحمد يعد إمن الرجال الشدادي
إبحنكته وبخبرته طول الأزمان
الأمن بإذن الله يسود البلادي
الموت حق ومالنا عنه مزبان
الموت حق وكلنا له إنقادي
نرجوك يا رب الملا جود باحسان
إلـ نايف المحبوب يوم المعادي
وبجنة الفردوس تجزيه مسكان
يالله يالمعبود يا خير هادي
شعر/ يوسف عبدالرحمن الوهيب
القصيم - عنيزة
