فهقت عثرات الطريق وتيامنت

معاد ابي عن ماضي الوقت تبرير

ولو شانت وجيه المقابيل ما شنت

وعن طول ظل العصر سجلت تقرير

وعن مجمل اللي فات من وقت دوّنت

واخذت عن بعض التفاصيل تصوير

قلّبتها في راسي سنين وايقنت

ان السوالف ما تعشي المسايير

وان الرفيق اللي على وصله ادمنت

احيان ما يسقيك من جمة البير

واليوم جبت اللي على البال واعلنت

ما سقت كسب الرابحة في المخاسير

اما من شداد التقاضي تمكنت

وعن مجهم الرفقة شريت المغاتير

والا على ما قيل شمت وتسلطنت

وعن سكة الشرهة قصرت المشاوير

يا صاحبي لو قلت ما قلت واذعنت

الصيت يبغاله مع الوقت تدبير

لا تقول لي كنا ولا اقول لك كنت

عند المواقف يظهرون المناعير

سبق نصيتك في لزومين ما بنت

واليوم في الثالث ما نقبل معاذير

اما ترد الطيب بالطيب لاهنت

والا عزلتك في شبوك المعاثير

** **

- نايف المطيري