آه عزِّي لعيني هذا ثالث شهر

آثر عين المولع ما تعرف المنام

سبّة اللِّي جبينه مثل نور القمر

أو سناء برق صيفٍ شع وقت الظلام

أتصبّر ولكن ما قويت الصبر

وأتحفّظ ولا ودِّي يبين الكلام

وش بلاني بحبٍ شفت منه الكدر

عقب ماتاب قلبي عن طريق الغرام

إن بغيت المواصل قال من غير شر

ما درى إنه منقّض جرح عشرين عام

آخر العهد فيهم في ثلاثة صفر

وخايف البعد يوصلني لشهر الصيام

يا منور حياتي.. يا ربيع العمر

ارحم اللِّي جرحته يا حبيبي حرام

وألطف بحالة اللِّي ما قنع بالغدر

غايته لو تكرّم.. شوفتك والسلام

** **

- محمد المتروك