ودّي ولكن كيف تحقيق ودّي

عيّا زماني لا يجيني على الكيف

لقيت من وقتي عناد وتحدّي

يمرّني عمري مثل عابر الطيف

ياما تمنّيت الدقايق اتهدّي

وياما تمنّيت الشتاء ينقلب صيف

ظلم الليالي مع نصيب متردّي

تجمعوا وأصبحت أنا عندهم ضيف

وغديت تايه دمعتي فوق خدّي

دمعة يتيمٍ لوّعته للصواديف

وفصلت من خام الشقاء ثوب قدّي

وكسيت نفسي بالعناء والتحاسيف

ولقيت من حبيت عنّي يصدّي

والسالفه طالت وراحت سواليف

قلبي ومحبوبي مع الوقت ضدّي

وكل شيء يهون إلاّ صدود المواليف

يا نفس لأيام الجفاف إستعدّي

موتي قهر والاّ على ضربة السيف

**

- ناصر القزلان التميمي