إن حصل وبيوم قالوا الناس ويني

قل لهم غايب.. وراجع بعد فتره

قل لهم وإن غاب تلقونه بعيني

لا تطرّي فراقنا يكفيني.. مُرّه

الفراق أتعبني.. ولا هو بيديني

انتهينا.. وحالنا محسوم أمره

لا تقول.. اتشمّت العذّال فيني

يقهرون القلب ويزيدون كسره

قل أنا أتحرّاه وهو باكر يجيني

كل غايب في غيابه معه عذره

قل لهم أهواه وأدري يهتويني

وكل واحد عارفٍ.. قالقلب قدره

ما أبي أحرجك.. يا فرحة سنيني

ولا أبي تزعل علي.. ولا تشرّه

وش لهم باللي حصل بينك وبيني؟!

وإن حكوا عن حالنا بنزيد حسره

** **

- تركي بن عبدالعزيز بن أحمد السديري