عز الله اني فالليالي تعلمت

درس يفيد القلب لاصار صاحي

عن رفقة الناقص تراني ترفعّت

واخترت عن دربه دروب السماحي

ولهل الوفا والجود والطيب رافقت

وجنبت درب اللي تمنّو مطاحي

مشيت فالدنيا ومنها تغنمّت

لين أوردتني كل عدٍّ قراحي

وشربت من نهر المراجل وجرّبت

واخترت من كثر التجارب صلاحي

أحيان تمشي لي على الطوع لاقمت

وان عارضت طوّعتها في مشاحي

يوم اني آمنت وعلى الله توكلت

طوع لي دروب السعد والفلاحي

وعديت في راس الطويله وهيجنت

وغنيت قافٍ مثل نور الصباحي

وقالو لي الحضّار لاهنت لاهنت

لاهنت ياقافٍ على البرق لاحي

يكتب كلامي بالذهب لا تكلمت

والا الردي فالوقت يمحاه ماحي

** **

- حشر بن عبد المحسن بن حميد