الموضوعات الأكثر
غاسلٍ كفّي من مصافحة بعض اليدين
وقافلٍ بوجيه أهلها صناديق البريد
وشايفٍ شيءٍ لي أعوام مالي فيه عين
وقاطعٍ خيط الهقاوي بسكّين الوكيد
وخالصٍ من طيب ظنٍ موهّقني سنين
وظاهرٍ لي عقب عرف العرب عقلٍ جديد
وطايحٍ من عيني رجال عندي كان وين
وحاقرٍ منهو يقيس الأوادم بالرصيد
ومحتمٍ من غدر الأصحاب في حصنٍ حصين
ولابسٍ لرماح الأقراب ثوبٍ من حديد
وماضيٍ مني على اللي تمشّيني يمين
ماتجي منهو قريبٍ والى احتجته بعيد
المواقف تشخل الناس والطيّب يبين
كل عام يطيح تسعه ويصفي لي وحيد
اشهد ان خير المدارس تجارب الاولين
واشهد ان رأي التجارب هو الرأي السديد
واشهد إني للبلاوي على الدنيا مدين
كلٍ ماراجعت نفسي طلعت المستفيد
وانت ياللي عقبك الزين بين البيض شين
مستحيل يطوفك الشعر وانت أهل القصيد
القصيده في عيوني بدونك ماتزين
لازم ان أجيب طاريك ياملح النشيد
انت ياللي من بطين الفؤاد إلى الأذين
والله إن حبك مع الوقت ماينقص يزيد
في غيابك لك محبه ولك شوق وونين
وفي حضورك شف عيوني كلامي مايفيد
اقهر الضيقه بذكراك من حينٍ لحين
وانثر دموعي على الوصل من عيدٍ لعيد
لك غلا سبحان ربي مَلا الدنيا حنين
ولك وفا سبحان ربي ماكن في الكون غيد
شف مكانك في مكانٍ عن العالم دفين
في مكانٍ من ورا مثل عيدان الجريد
مكرمٍ حبك وله في الحشا سمن وسمين
يقعد من الحال واصب له بنْ الوريد
إفتضحت من الهواجيس بك في المسلمين
كل من سولف علي قلت له وش قلت؟ .. عيد
الهوى سجن العشاشيق وأنا لك سجين
وودي إن سجني مؤبد ولي حارس وقيد
عزتي لي من فراقك عسى ربي يعين
أدري انه في طريقي ولو وصلك مديد
صابرٍ غصبٍ ورى الخشم لو جرحي مكين
ودي أفعل لكن الله يفعل ما يريد
** **
- محمد بن فطيس المري